الموضوع كومبلكس كالعادة...وكالعادة باردو مستخبي قصاد عنينا بس مالناش شوق نشوفه...
وطويل وممل بس معلش...
ومقدمة طويلة عني كمان لانها في صميم الموضوع.
انا واحدة عادية جدا...الحاجة الوحيدة الثابتة هي ميلي الشديد للانسان..على بعضه وبتفاصيله..بكل اختلافاته مع غيره ومع نفسه...باحب الناس عشان هم ناس..ببساطة ومن غير زواق.
باكره الوصاية..وباكره الافكار الموروثة.
انا صريحة لحد متعب وكتومة لحد متعب اكتر..ولدت لاسرة مسلمة...لم يكن هذا كافيا لاقتنع باني مسلمة. وبمنتهى البساطة لاني صريحة مع نفسي اعلنت لها اني مش مسلمة..فقدت الايمان بفكرة قوى عليا تسيطر على الكون لفترة...وبدأت رحلة بحث طويلة في الأديان وتاريخها ومبادئها...الرحلة رجعتني للاسلام..ميولي السابقة كانت معادية للرأسمالية بشدة واشتراكية الى حد كبير وما زلت اكن للمدرسة دي التقدير.
بس انا باكره المنطقة الرمادية..بالنسبة لي هي مملة وتفتقد الحماس..ولاني اسلمت عن قناعة حبيت اطبق كل حاجة باتعلمها اول باول ولقيت في الاسلام ما يكفي لاشباع ميولي الاشتراكية.
بكالوريوس اقتصاد ومعايا لغتين. باشتغل في التنمية البشرية في مشاريع ذات مدة محددة و خبرتي 7 سنين. وبفضل الله ناجحة في شغلي لايماني بقضية ان البشر اساس الحضارة مش العكس. كنت ناجحة يعني.
حبيت اتعلم عن الدين من مصدر موثوق، فالتحقت بمعهد اعداد الدعاة التابع للاوقاف، الدكاترة ازهريين يعني. وحصل لي حالة نفور من المعهد لما دكتور الدعوة قال: "أنا ما اعرفش المتبرجة اللي كانت بتروح التحرير كانت بتروح ليه. اكيد مش حبا في البلد". كانت اخر مرة اروح. يعني من الاخر، انا كانسانة ارفض اي نوع من انواع التفرقة، ضد اي حد ايا كان بسبب اختياره الشخصي حتى لو كنت شايفة ان اختياره مش صحيح. ولعبة النية دي بتعملي ارهاق معنوي وذهني.
كفاية عني. نخش في الموضوع. المسيحين مضطهدين في مصر، صح؟ تفرقة مؤسفة على اساس الدين تصل الى اكل العيش. حاجة مقززة وطول عمري باحربها. كنت فاكرة ان ده مجرد تطرف من البعض. وبعدين اكتشفت مأساة. الاضطهاد ممارسة شعبية. ثقافة خوف من الاخر بناءا على معتقده. ثقافة تشويه للاخر لتلميع الذات. للاسف الذات ما بتلمعش وانشالله ما عنها، بس الاخر بيتشوه ويتفرم ويتوجع ويتكره ويضطهد وتوصل لاكل عيشه. مظاهر اضطهاد المسيحيين متعددة ومنتشرة مش محتاجة مني اي سرد.
طب ومظاهر اضطهاد الاسلاميين (مع اعتراضي على الاسم الامريكاني البحت بس ماشي) هي كمان متعددة بس الاعلام بينقل تشويه بس. والمشكلة ان طول ما في فئة مضطهدة هتتطلع فئات تانية مضطهدة. مش فارقة معايا مين اللي بدأ. كل اللي فارق معايا اننا نبطل وبس. كل واحد يبطل "ستريوتايبينج" ويبطل يعمل اي فرد في الدنيا على مجرد انه جزء من مجموعة ويلغي فرديته كده بمنتهى البساطة واليسر. مطلبي هنا اني اتعامل كفرد واعامل غيري كفرد بغض النظر عن انتماءاته. اتعامل معه من غير احكام مسبقة.
يعني لو شيخ سلفي غلط، وده وارد لانه انسان، ما طلعش عين ام كل السلفيين، ولو المرشد غلط، ما طلعش عين كل الاخوانجية، ولو القسيس غلط، ما مسكش في المسيحين طاخ طاخ، ولو المثقف العلماني غلط، ما اقلش هم كلهم اشكال ضالة، الخ الخ الخ...زفي نفس الوقت لو اي من الناس دي بيمثل رمز حساس عند الناس انتقد كلامه/فعله من غير تشويه لشخصه، مراعاة لمكانته عند الاخر. صعب؟
في ناس بتدافع عن فئة مضطهدة في برنامج وتضطهد فئة تانية في برنامج تاني. نفاق صريح وانعدام مبادئ. الكلام للكل. هي نظرة اعمق للموضوع مش اكتر. ولا دفاع عن حد ولا هجوم على حد.
.دي شهادتي الشخصية عن بعض المواقف المهلبية اللي بتحصل لي من يوم ما اتهبلت في عقلي وقررت اتحجب والبس عباية. وشهادتي عن بعض المواقف التي تعرض لها من حولي ممن لهم السمت الاسلامي اللي بيخوفوا بيه العيال الصغناين بدل ابو رجل مسلوخة. لمجرد اضافة بعد جديد لفيلم الاضطهاد والتفرقة. لا ادعي ان كل الناس كده..مجرد اني باقول ان في ناس بتعمل كده فعلا بس ماحدش واخد باله، يمكن لان صورة البعبع ترسخت فالبعبع مش انسان ويستاهل.
· على الصعيد العملي ومحيط العمل:
1. خلص عقدي في المشروع وكنت بادور على شغل. قبل ما اتحجب باسبوعين، عملت انترفيو في مكان محترم، كانوا هم اللي بيجروا ورايا عشان اشتغل معاهم، وربنا اراد اني اتحجب بعده على طول. كلمتني الست عشان تديني العرض بتاعهم. في حاجة في عقل بالي قالت لي قوليلها يا بت انك لبستي عباية لحسن يكون كلام العيال الاسلاميين ده صح وبيعتبروهم منعدمي الكفاءة بسبب لبسهم. قلت لها. ودخلنا بأه ف احم احم احم احم لحد ما صدعت انا. قالت لي هاسأل مديري. مديرها ده بأه كنت باعمل معاه شغل قبلها وكان شايف انه مش لازم يعملي انترفيو ويبعتولي الاوفر على طول. المهم، تاني يوم بعتت لي رسالة آسفين لسحب العرض بس أصل العباية....
- أنا قلت لنفسي اختبار ربنا سريع، يإما نثبت ياإما نتلخلخ. ومع ذلك، نعم؟ ايه؟ هو ده كباريه؟ فمتطلبات الشغل فيها تكشف يعني؟ فرق شاسع بين الرضا بالقضاء وقبول الظلم.
2. معارفي السابقين من الشغل اللي أغلبهم كان يسعدهم إني اشتغل معاهم، مش هينفع يشغلوني عندهم عشان العباية مش من متطلبات العمل وبصراحة، من الاخر، مظهر للتطرف.
- يا ناس اتقوا الله، ده انتم بقالكم 4 سنين عارفني، هتطرف فجأة يعني؟ انا هنا باتكلم عن ناس متأكدة اني مش متطرفة. بس عندهم مخزون اعلامي يخليهم يصدقوا الرجل اللي في التليفزيون وما يحكموش عقولهم.
- الرسالة وصلت. ماليش اكل عيش في مجال التنمية اللي هو كاري. الظريف جدا ان اغلب شغلي كان ميداني، و كله زيارات للمصانع وتعامل مع العمال. وده كان بيقتضي اني البس لبس اشبه بالعباية عشان اغلب العمال محافظين حتى لو مش لاسباب دينية.
- غلطت انا وسلمت نمر. قلت وادي قاعدة في البيت. افترضت انهم لهم حق ما يشغلونيش. اكتشفت ان جزء مني جواه مخزون معادي للعباية بصورة كافية اني اتصور انهم لهم حق ما يشغلونيش في شغلانة لازمها عباية عشان انا بالبس عباية. المخزون ده كان موجود على الرغم اني كنت بدافع عن اختيارهم طالما مش مجبرين بصفتهم كاملي الاهلية مش ناقصين وصاية.
3. رجعتني الحوادث دي لطرفة كده دمها سم حصلت في مكان باشتغل فيه. استفتا غير رسمي علي قبولنا كموظفين ان واحد ملتحي يتعين معانا واللا لأ.
- هه؟ نعم حضرتك؟ مش فاهمة يعني؟ الكفاءة والمهارة والبتنجان كانوا معايير بيقيسها مدير الموارد البشرية والمدير المباشر واللا ايه؟ يمكن طريقة جديدة. مذهب الديمقراطية يطبق عمليا في الشغل. بس يا ريت لو على الكل.
- أنا ما اعرفكش بس انا اسفة لحضرتك اني ابديت استيائي من غير ما اعمل فضيحة. يارب تقراها وتسامحني.
4. اخيرا لقيت شغل في مدرسة. لزوم المم وكده. حكم الاوشاعة بتاعة الاسلاميين بيصلوا في الضلمة طول الوقت دي طلعت هجص. ده كان في فترة الثورة، الاجانب طفشوا فقررت ابقى برجماتية واستغل الفرصة.
- ولا سحر ولا شعوذة، تقريبا اشتغلت في نفس اليوم، قلت ناس طيبين قوي يا خال. وبدأ اعلامنا الطيب في بث الرعب في النفوس. السلفيين بياكلوا الودان اقامة للحد. الاخوان قادمون. كله يأمن على راسه وايديه. وطيييييييي. اوعوا البعبع.
- كل يوم تطلع اشاعة، وكل يوم يتعملي مجلس تأديب من الاخوة الزملة. وكله كوم واليوم بتاع اي واحدة هتنزل من بيتها من غير حجاب هيخطفوها، اي واحدة رايحة الشغل هيخطفوها، اي واحدة سايقة عربية هيخطفوها. المعاملة كانت على اساس اني انا قائدة حملة الخطف. وماله؟ بس يا ترى هودي كل النسوان دي فين؟ يا نافوخي يامه.
- وقد قيل: انت عاوزة دولة دينية صح؟ انت واللي زيك عاوزين تقطعوا ايدينا! اقولهم هو انتم بتسرقوا عشان حد يقطع ايديكم؟ ومش هارد ع السؤال الاول لان ده موضوع يطول شرحه وما يخصهمش في حاجة اصلا. انا عاوزة ايه؟ انا عاوزة الناس تسيبني في حالي الصراحة.
- ما بين المدرسين وبعضهم في اي حتة ان مهما كان مدرس بيكره التاني، استحالة يوضح ده لاي طالب او يسمحله بتجاوز فيما يخص المدرس لان الفصول كده هتبقى كارثة. (المدرسين اغلبهم بيكرهوا بعض وده من اسباب تدهور المنظومة التعليمية والخاقية في البلد، ودورهم جي). في أوضة المدرسين، سمعت طالبة بتقول لمدرسة: بكرة كلنا نبقى لابسين هلهلي كده زيها والمدرسة تضحك وترد وينقبوها هي وتاخد خازوق. احنا نناديها نقول لها يا دادا..همممم شيء رائع مذهل..عنصرية وفوقية وطبقية وفئوية..كل الخالات متجمعين..انا باحب الدادا..اكتر منهم بكتير لاني لما عيطت في الحمام خدتني في حضنها وقالت لي مين زعلك؟ دانتي ست طيبة وجدعة..فعيطت اكتر..انا مش زعلانة عشان دادا شتيمة، زعلانة عشان هم شايفين ان دادا شتيمة وبيشتموني بيها.
- الادارة مالهاش فيه. كويس قوي انهم شغلوني، خاصة ان الاجانب بدأوا يرجعوا فلو عاوزة كرامتي اروح اقعد في بيتنا. وبعدين ما انتي فعلا شبه الدادا. في اشارة وقحة لبشرتي الداكنة وعبايتي. وباردو قصدهم شتيمة.
- شهادة حق، الطلبة اغلبهم كان سخيف لانهم من ابناء الفلول وانا شكلي اخوان وعملت انقلاب وضحكت على الشعب وهاحبس اهاليهم. نياهاهاها. بس كان في جزء منهم حاسس بيا ومؤمن بالثورة جدا كمبادئ تدعو إلى نبذ التعصب ضد الاخر فهونوا الامر.
- شهادة حق تانية، صاحبت في المدرسة دي روس وامريكان وبت صينية سكر. كان بيننا عنصر مشترك هو اضطهاد المدرسين لينا، انا عشان دادا وهم عشان اكيد شحاتين في بلادهم. الشعب يريد اعدام خالتك فوقية.
5. رحت انترفيو في مدرسة والست طحنتني انجليزي انجليزي انجليزي. ورفعت حواجبها وقالتلي "أو ماي جاد، يور إينجليش إذ كوايت إمبرسيف" وبعدين قابلتني مرة كمان. وقررت ترقيني بعد ده كله من دادا لمشرفة. نفس اللي قلته على الدادا هاقوله على المشرفة.
6. اعرف مهندسين كتير ملتحين مش لاقيين يشتغلوا حتى مندوب مبيعات، مع انها شغلانة عليها الطلب طول الوقت. ليه؟
7. مدير جوزي السابق راح شغل جديد وكلمه عشان لازم ييجي يشتغل معاه. وطبعا لانه بقى ملتحي، لحية مودرن اي نعم بس مش فارقة، اول ما شافوا قلب خلقته وقال له مش عاوزين النهارده. يا عم انت نسيت؟ انتوا اللي كنتوا عاوزين.
8. انا هرمت وورمت والامثلة كتير فيما يخص العمل ومحيطه. ولو هي كلها خاصة بيا لوحدي، ما كنتش كتبت. بس لو اي حد خد الوقت انه يسمع للمدعو بعبع، هيلاقي كتير من ده.
· على الصعيد المجتمعي:
1. بعد ما اتحجبت على طول، جوزي عمل حادثة جامدة لانه اغمى عليه وهو سايق فدخلنا في دوامة التحاليل والاشعات والدكاترة. اختفيت عن صحابي 3 اسابيع محدش قرر يكلمني فيهم. يشوف اختفيت ليه. صحابي عشرة اكتر من عشر سنين. كل ما واحدة ترد، تسبق ب "طبعا، ما اللي علي علي واحنا كفرة ولاد كلب". في ايه بس يا جماعة يهديكوا يرضيكوا، حصل كذا وكذا. طبعا واحنا مش مقامنا دلوقتي انك تحكيلنا وانت في ازمة، ما احنا كفرة ولاد كلب. مش عارفة الموقف حاسسني باغنية بهاء سلطان "وافضل احايله ما يردش، اقوله يا سيدي ما يردش". تحفز رهييييييييييييب. علما باني كنت حاملة لواء الصياعة في الشلة يعني من الاخر مش هاينفع ارفع لواء العفة في وشهم. ولا عاوزة ارفعوا في وش حد. بس نفسي ارفعوا مع نفسي. صعب؟
2. في المحيط الاسري، البت اخوها الصغير جندها مع الجماعة. اه احنا دخلنا في الوحيد حامد سيندروم وده علاجه صعب. وشغل امن دولة بأه عشان اتطهر واعود لرشدي. رشدي مين؟ هو في حد لسه اسمه رشدي؟
3. اخويا سلفي وافتخر. وستين افتخر. العيل السيس بأه بيفكر في غيره وبيقرا ويتعلم ويشتغل ويبر اهله وياخد باله من الغلابة ومتجوز وفاتح بيت وعنده عيل ولما باتزنأ في فلوس بيسلفني وهو كل مرتبه 1500 جنيه عشان ظروف الدقن. مع انه في الجامهة كان بيشتغل وياخد أدهم مرتين، كان من غير دقن اصله. بقاله 6 سنين سلفي. انا لا أفضل الانتماءات بس دي حريته طالما لا ضرر ولا ضرار. كنا في أوضة واحدة، وانا في اتجاه معاكس تماما لاتجاهه، مقاليش اتحجبي، كان بيحاول يفكرني بربنا بالحسنى بس عمره ما قال لي اعملي او ما تعمليش. وكنت باسمعه بالليل بيعيط وهو بيدعيلي عشان خايف عليا من العذاب. انا مش فاهمة ليه الناس شايفة ده جرم؟ كل صاحب دين او مذهب او فكر مقتنع به يظن انه على صواب. امال معتنقه ليه؟ وجاهة اجتماعية؟ اتعمل له ارهاب فكري عشان هو كمان يعود لرشدي. ما تحل عنا يا عم رشدي. الحملة الارهابية كانت عنيفة، ممنوع الصلاة في المسجد، ممنوع تصاحب س و ع و ص. س و ع و ص دول بأه صحابه من ايام حضانة واتجهوا الاتجاه السلفي. ما فيش مصروف. ما فيش شغل. ما فيش جامعة. سلسلة لا متناهية من المافيش. الله أكبر على الصمود. الواد اللي كنت باقول عليه خرنج صامد ومتمسك بموقفه، واهم حاجة بطل يلبس فلاشي بينك تيشرتس كوز اتس فاشونابول. وقمة في البر مع أمن الاسرة. مسحول مشاوير واحنا عيلة ربنا باليها ببنات بس، كل شوية ياخد عربية حد مننا يصلحها، امي تعبانة وانا مكبرة يقوم ينضفلها البيت. فجأة بقى بيكلم الفرع الاسكنراني من العيلة المكون من 192 نفر (ما شاء الله). كل أمله يبقى طالب علم مكفي بيته و يتجوز البت اللي بقيت مراته ومتربية على ايدينا واهلي رافضين عشان هي منتقبة واهلها رافضين عشان هو ملتحي. الحمد لله أقنعنا العيلتين في الاخر يخلصوا منهم ويجوزوهم لبعض. البت اللي في اول يوم في افطار رمضان العائلي اللي كلنا بنروحه وندعي ربنا يسلم عشان التجمعات خطر، دخلت تبوس حماها فقام شبه زقيقها وقايلها ما بابوسش عفاريت، ايه الارف ده؟ وسكتت وقعدت وعملت فيها انا مش انا انا واحد تاني. وده يكمل عليها تريقة ودي تكمل عليها سخافة بطريقة غير موضوعية اختذلت شخصيتها في نقابها. لغوا انسانيتها عن عمد. وطالبوها تقبل او كارت ارهابيين يترفع على طول.
4. بنت جارتي بتخاف تمشي في الشارع اللي فيه مقر الاخوان، امها تقول لها يا بنتي انت مش زميلك في المدرسة اخونجي هو واهله؟ اه. طب مش ناس طيبين؟ جدا يا ماما. امال مالك؟ في التليفزيون بيقولوا....
5. تجربة الوقوف في الطابور في السوبرماركت عشان احاسب، يا إلهي رحمتك، كم نظرات البغض والقرف،. وأوقات التريقة أم صوت واطي يتسمع عن عمد لا يطاق. ولهم لزمة "أشكال وس.. مليت البلد". المشكلة مش في كده، المشكلة اني عصبية، ساعات اعمل فيها انا مش انا وساعات ازغر لهم، وفي دي لهم لزمة تانية "الوضع بأه يخوف، ايه الارهاب ده؟ هو ده الاسلام؟"....يا مثبت العقل في النافوخ يا رب. حضرتك شتمتيني، وانا سكتت، و انتي فلتيني بص من فوق لتحت ولما بصيتلك بقيت انا اللي ارهابية؟ ومطلوب ممن يتبع الاسلام انه يبقى ملاك ما بيغلطش، ولو غلط يبقى حيوان لا مت للاسلام بصلة. ده ايه الدين اللي متبعيه بيبطلوا يبقوا بني آدمين ده؟ وفرقوا ايه عن اللي قال متبرجة تبقى نيتها مش كويسة؟ من منا لا يعصي؟ الافتراض ده مخالف لمفهوم الانسانية.
6. في ناس في الاماكن العامة، لو داخلة مع صحاب ليا لهم نفس السمت، بيجيلهم هلع "تشك بليز، تشك بليز، تشك تشك تشك". طبعا احنا الحامل اللي معانا دي مش حامل في عيل، حامل في قنبلة وهتضحي بكل صحابها. نياهاهاهاها. فجروا المكان. بوم بوم.
7. واحدة من قرايب جوزي اليساريين التقال، قالت لي هانضم للحزب بتاع انفخوا العجلة اللي الملهم الحقيقي بتاعه اللمبي ومشروع البسكلتة (هي الحقيقة قالت المصريين الاحرار مع رفضي للاسم)، قالت لي هانضم عشان احاربكم. احنا مين؟ انتوا الاخوان والسلفيين وامثالكم. انا اعلنت الجهاد المقدس عليكم. وبما اني باعرف جوزي من 5 سنين وهي متأكدة اني مش اخوان ولا سلفيين، قررت اسأل السؤال المهم: بس سويرس بيمص دم الناس وبلاويه كتير ومعروفة، والحزب توجهه رأس مالي بصفة مخيفة. قلت هتدافع. وكانت الصدمة: مين قال ان توجهه رأس مالي؟ قلت: ساويرس قال (مش مصدقة ان حد بثقافتها وسنينها في لندن هينضم لحزب من غير ما يعرف توجهه عشان يجاهد معرفش ايه). اقول لها بس ده الموضوع فيه دم في العراق وافغانستان وارهاب العجلة الخ الخ..تقول لي: مش مهم، المهم نحارب اللي زيك. أوكي، ثانك يو أنتي فيري ماتش، كان آي فايت يو باك أور ذيس ويل بي كولد تيروريزم؟
8. باردو تعبت والامثلة كتير. وبما ان في شوية نخبويين بيطلعوا في الجهاز يقولوا: "العيلا الاسلاميين بيلحسوا مخهم، بيقولوا لهم حاجات غير اللي اهاليهم بيعلموهالهم. يعني بنتي تيجي تقول لي انا شايفة ده صح وده غلط. انا اللي اعلمها مش هي الل تعلمني. اهالي الاسلاميين بيطلعوا عينهم. ما اعرفش حد اهله ناقشوه في اختياره. كله كروت ارهاب غير موضوعية بسبب الست دي واللي زيها وفكرهم. كل ده بأه وهي جاية تتكلم عن خبراتها في ترسيخ مفهوم الحرية في المجتمع..دي كوميديا سوداء.. مبارك بابا وبابا مبارك يعني؟ الاتنين فوق الغلط؟ مطلوب مني اني اقتنع بكل اللي اهلي علموهوني في المطلق لانهم ما بيغلطوش؟ سوري دير بت آي بريفير تيروريزم إف ذيس أيز فريدوم J ربنا عالم أنا باحترم أهلي ازاي وعارفة اد ايه تعبوا عشان يعلموني ويربوني، بس هل ده معناه إني أسلم أن كل اختياراتهم و قناعاتهم صح وهي هي نفس اختياراتي وقناعاتي؟
![]()
تتميز الشبكة المعلوماتية بفيس بوكها وتويترها بان محدش شايف العباية فبيكلموني على اني انسانة. وده في حد ذاته اثبات ان مطلبي مش عويص قوي كده. فاهمين اني انسانة ويقعدوا يشتموا في العباية وانا اعمل فيها عبيطة وانا مش انا باردو. بس ساعات الوجع بيزيد قوي لما حد يشتم في اللي انت بتعمله وهو عارفك وممكن بيعزك وانت مثال حي قدامه ان مش كل عباية ودقن يساوي تطرف وارهاب. وفي المقابل في ارهابيين متطرفين من غير عباية ولا دقن.
الارهاب هو عملية تخويف مستمرة من حاجة معينة. والارهاب الفكري ارخص من الارهاب الفعلي واوسع انتشارا. زي بالضبط الاستعباد الاقتصادي ما هو ارخص من الاستعباد الفعلي، اللي بيتكلف هدمة ولقمة وعشة للعبيد. وهدفهم واحد. نفضل كلنا خايفين من بعض ونتوه عن اللي بيحاول يستعبدنا.
في سؤال بيؤرقني كتير. الاسلاميين متهمين بحب العزلة. اغلبهم انعزالي فعلا. هل عزلوا انفسهم ام تم عزلهم؟ انا اتطردت من مجال شغلي اللي باحبه، ومن اهلي ومن شلتي ومن السوبر ماركت ومن اماكن الخروج. طب مش هانعزل ازاي؟ بلاش...هامارس الاجتماع فين يعني ومع مين؟ واذا كان صحاب العشرة الطويلة عندهم حساسية في البساسية مني، متوقع مني ازاي اعمل صحاب جداد؟ واذا كنت باتشتم يا دادا وياللي عاوزة تقطعي ايدين الناس و..و..و..، اصاحب زملاتي في الشغل ازاي؟
ده مش دفاع عن فكر الاسلاميين، ده مجرد توثيق لانهم بني ادمين، لهم ما لهم وعليهم ما عليهم، ومن كان منكم بلا خطيئة فليرجمني حتى الموت ان شاء.
المسيحيين مضطهدين والاسلاميين مضطهدين والفقرا مضطهدين والبهائيين والصوفيين وال وال وال وسلملي على خالتك فوقية اللي بتديهم كلهم على قفاهم وتسميهم فئوية وقد تم اثبات ان فئوية دي تبقى خالتك باردو.
نفسي اعيش في سلام، نفسي معاملاتي مع الناس ومعاملاتهم معايا تكون مبنية على واقع الحال مش اراء الاعلام ومفاهيم معوقة راسخة في الذهن، رسخها اصحاب المصلحة في التفرقة بين شعوب بأكملها ولما نجحوا دخلوا على فئات المجتمع وبعدها جوا كل فئة نفسها. مش عاوزة الاختلاف يخلص، سنة كونية من غيرها الدنيا تبقى مملة..بس نفسي في المعاملات اليومية، المشتركة ما بيننا جميعا، نركز على العوامل المشتركة...ده العالم الموازي اللي انا عايشة فيه، باحاول يعني. والله عالم الطف بكتير من عالم الخوف. معقولة ماحدش عاوز ييجي يعيش معايا فيه؟
