Ode to Tarek

عننا

عن الجري ع البحر ورا بعض بالليل

عن لما كنت بتروحني وبعدين تكلمني طول السكة وانت مروح لحد ما ترجع البيت عشان تكلمني باردو

عن لما كنت بتقولهم مالكوش دعوة بيها، سيبوها في حالها، وتتخانق وياهم عشاني، واقولك متضايق من ايه، تقولي ولا شي

عن ساندوتشاتي اللي كنت باجيبها عشان انت تاكلها بس عمري ما قلتلك، اه وربنا

كون في مكان احسن لحد ماجي بقى، شكلي هاجي قريب

عن اللي حبك وحاوطك بحبه وعمره ماقالك، بس عمرك ما شكيت :)

عن لما قعدت تتأسف لي ان حصان البحر مش كائن خيالي بعد ما اصطدناه عشان ابطل اعيط

عن ابن الوسخة اللي شمت في موتك

عن انك وحشتني وعارفة اني مش هاشوفك تاني ابدا

يا رب كون حنين عليه، يا رب هو كان حنين عليا، وانت اولى منا بكل رحمة

عن الضحك اللي بيقلب بعياط والعياط اللي بيقلب بضحك

عني وانا باغلس عليك وباقولك بس انا اصلا مابحبش العيون الخضر وكانوا عيونك احلى عيون

ضحكت عليا ومت

عن حد خباك جواه من غير ما تطلب منه فمات بس انت لسه بتحس روحك مستخبي جواه

احا لو كنت فاكرني نسيت، احا لو كنت فاكر اني هانسى بيوم

عن لما كنت مروحني وقلت لي اسمعي ده بس يرجع! وادتني اول شريط لميتاليكا وكان لونه موف. ولما جيت ارجعهولك، قلت لي انت واحدة حمارة وغبية :)

عن عهد بيننا عمرنا ما نطقناه

عن امي اللي لسه بتسالني عليك كأنها زي زمان عاوزة تقولي ما تضيعيهوش من ايدك :)

عن التوكة اللي كنت بتشدها من شعري عشان اعمل دوشة ونتطرد من الفصل سوا عشان وحشتك

عن 12 سنة كاملين من عمري ماكنش فيهم غيرك :)

عن سنين بعدها وانا كل لما اتعب او الدنيا تهرسني او ابهدل روحي اجيلك واعيط واشتمك عشان ما بتردش

عن اللي ماتوا واحنا متنا معاهم بس لسه عايشين

عن لما اتخرجنا من المدرسة وانت قفشت اني رايحة جامعة غير جامعتك، وانا قلتلك ما تخفش :)

عن اول مرة خرجت وياهم من وراك وانت عرفت وما قلتليش حاجة وانا كنت هاتجن فجيت قلتلك اف عليك :)

عن امي وهي بتقولي بقالنا كتير ما عزمناش طارق ع حمام محشي

عن الورد اللي كنت بتقطفهولي وانا اتخانق معاك عشان كده هيموت، بس ابقى من جوايا مزقططة :)

ايه الجنون ده، نايسي غيرانة منك ليه دلوقت؟

بطلي غلاسة

وبعدين بقى؟ طب يا ستي ما انت عارفة اني باحبك :)

بطلي زن، عمري ما عرفت حد زنان اكتر مني غيرك اصلا #نانسي باحبك يا ستي ما تاخديش على خاطرك بقى

الجدعان بيموتوا بدري، بغض النظر عن اي شي، طارق ونانسي كانوا تعريف اصيل للجدعنة، عشان كده ماتوا بدري

انا اغبى حد قابلته بحياتي

 لا انا غبية فشخ، انا بافهم متاخر 10 سنين، طارق مات زي دلوقتي سنة 2004، وانا لسه فاهمة دلوقت!

عن صحابنا اللي بطلت اقابلهم عشان مش عارفة اسمع اسمك بيمر عادي كده

انا مش زعلانة، انا باحب احكي عنه

انا ليه عمري ما كتبت عنك؟

عن اخوك لما قابلني في الشارع وعملت روحي معرفهوش فكلمني بالليل وقالي اسف

عن لما كانت تعجبني حاجة عندك واسالك جبتها منين، فتقولي مكان غلط واروح مالقهاش واجي تاني يوم الاقيط جايبهالي :)

انا والله كويسة، ساعات بس الوحشة بتقتلني وباكتب وبانسى ان فيه فولورز وكده، بس انا كويسة

عن القعدة عند الكشك وامي وهي بتزعقلك عشان انت عارف ان ده مش مكان يوقفوا فيه بنات، وانت بتقولها بنتك ست البنات :)

انا اتطلقت :)

 وصراحة شايفة ان المحاولات الجديدة مستحيلة

 ومش يأس، مجرد تسليم بانه كان فيه وخلص

يا قصص عم تكتب اسامينا

واركب مراجيح :)

كل ما اجف اجع :D

عن اول مرة قلت لي انتي حلوة قوي فضحكت وقلتلك انت قليل الادب :)

عن الجيلاتي ع البحر والدنيا بتشتي

عن قلبة وشك لما حد يكلمني كتير :)

معلش، انا اصلا والله ما زعلانة، مش عارفة ليه ده اللي واصل! انا ممتنة جدا انه كان موجود

 فات 8 سنين بحالهم

يا بتاع الياسمين، مين ينده لك مين؟ واحنا معانا الفل :)

عن لما سألتك وهي مش عاجباك ليه فرديت عشان في واحدة تانية عاجباني، وبعدها ب5 دقايق حشرت لي ف الكلام اصل انت حلوة جوا وبرة وباردو مافهمتش

عن لما كنت ادخل الفصل متاخر غشان سهرنا نرغي والاقيك ماجتش فاقفش وبعدين اطلع الاقيك مستنيني عند الكشك فاديك بوكس ف كتفك

عن لما كنا نتفرج سوا ع فيلم واحنا ع التليفون وابدأ ارغي فتقولي أف مش عارف اركز، فاسكت، فتقولي طب خلاص خلاص كلي ودني لو عاوزة، بس بلاش بوز :)

يا لهوي انا شايلة كل ده 8 سنين وساكتة؟ ما انا لازم ابوظ الدنيا طبعا!

عن اول مرة حطيت فيها كحل وانت قلبت وشك وزمجرت وقعدت تقولي شكلك وحش كده لحد لما عيطت وبعدين قلتلي معلش خبيهم احسن :)

الحد اللي بنكبر وياه، وتعدي علينا كل المراحل سوا، بيكون الوحيد اللي عارفنا بجد

عن امي اللي بتبصلي بصة يا وجع قلبي كل ما اسألها نسيتي طارق يا أمي؟ اوعي تكوني بتنسي تدعي له

عن حد حب حد لدرجة انه ماقالش وحد حب حد لدرجة انه مافهمش

عن "بطلي اغاني البنات دية" يا مستفز :D

عن لما كنت باعند وانا عارفة انك صح، واقولك انت ايه فهمك اصلا؟ وتثبت لي الايام انك صح بس تيجي تقولي باردو انت احلى مني

عن المحفظة ام 30 جنيه اللي بقالها 3 سنين عجباني ومحدش بيشتريها ولا بيشيلوها وانا مابشتريهاش عشان عارفة انك كنت هتحب تجيهالي بعد ما نروح

عن اني انانية اني باحكي عنك كده، عن اني نفسي اعرف اعيش مش تايهة، عن اني نفسي ماتقفش بيني وبين اي حد بيقرب، ما تزعلش بقى :(

عن ان محدش كان يستجري يفكر فيا حتى عشان انت ممكن تحط عليه جامد، مع ان "ماكنش" فيه حاجة

عن طنط مامتك وهي بتزغر لي زغرة الحما، وانا باضحك واقولها أمي بتحب ابنك وهي تعمل نفسها مابتفهمش عربي وانا متأكدة انها فاهمة

عن مواجهة الروح :) انا ماحفرتش جوا قبل كده، وتعاملت كأنه كان حد عابر وراح لحال سبيله، انا لو منه اكرهني

عن غلاستك ع الولا كيمو وكأنك بتقوله "هش هش"

 انا مارحتش العزا :)

ايوة بس انا ماعملتش اي شي، انا لبست وخرجت مع صحابي بتوع الكلية وماقلتش لحد حاجة

عن خناقة طالت اسبوع عشان انا حمارة وباكابر وانت تعبت مني بقى ولازم افهم، وباردو حمارة ومافهمتش

عن اللي بيغيروا منك مع انك مش موجود

عن كل مرة سمعت فيها "انا راح مني كمان حاجة كبيرة، اكبر من اني اجيبلها سيرة" وبكيت للصبح وانا مش عارفة انك انت الحاجة دي

عن امي لما فسخت خطوبتي وقالت لي "انا عارفة ان عريس بنتي مات من زمان"

عن حدوتة اطول من انها تتحكي

عن اول يوم اتقابلنا لما في ابتدائي ومحدش رضي يقعدني جنبه وانت ابتسمت ووسعت لي مكان وقلت لي "ازيك بقى؟" :D

عن ابن الوسخة اللي كان بيخاف يقرب مني عشان انت واقف له، عن ابن الوسخة اللي انبسط بموتك

عن لما قلت لي البت دية بتكرهك، وانا قاوحتك وف الاخر خدت ع دماغي، وانت كنت احسن من انك تقولي مش قلتلك؟

عن سنين بيفوتني فيها اتوبيس المدرسة قصد عشان تروحني مشي وانا عمري ما قلتلك ده عشان انت عارف اصلا يا سوسة

عن نهشهم لك بعد ما مشيت، وكأنهم قاصدين ينهشوا فيا انا

عن الزرعة اللي في الحوش اللي كنا بنسقيها سوا

 مش عارفة، انا كنت باخاف احكي عنه، ودلوقتي حاسة اني باسيبه، وحاسة بالذنب :S

عن لما كنت تتصل والتليفون مشغول فتقعد طول المكالة بتسألني كنتي بتكلمي مين واحلفلك اني مش عايشة بالبيت لحالي وتقولي اه صح وترجع تسأل تاني

عن انك عمرك ما طلبت مني اكون قوية، وكنت باسند عليك كانك جبل، وعمرك ما قلت اي

 الواقع اغرب من الافلام

عن امي لما كانت بتتعب مني وتسلطك عليا :D

عن لما دخلنا السيما نتفرج ع Phenomenon وانا قلبتها مناحة جوا الفيلم وساعتين بعده وانت قعدت تقولي وديني ما هاوديك سيما تاني

عن كل مرة سمعت فيها If I could change the world وانا متأكدة انك بتعمل ده فعلا، بس انت عشان بتعمل مش بتعرف تقول

عن كل الكلام الحلو اللي ماقلتهوش بس عملته فاتقال بجد

عن ضحكة عيونك اول ما اعرف ازوغ بالبيجاما واقول نازلة اجيب حلاوة من البقال عشان اشوفك 5

عن اني معرفش حد غيرك بيمشي مسافة ساعة ياخدها جري عشان يشوف حد 5 دقايق

عن رغي السنين، عن تفاصيل التفاصيل، عن لما تقولي لا يا هبلة انت يومها كنتي عاوزة تجيبي الموف بس مالاقتيش مقاسك غير الاسود

عن اني اتحايلت عليك ماتسافرش نويبع وانت نشفت راسك، عن اني ماردتش ع اخر مكالمة كلمتهاني عشان كنت قافشة

عن البحر اللي جمعنا واخدك مني

عن نانسي اللي كنت هتحبها فشخ لو قابلتها، مع انكم كنتم هتطقشوا في بعض كتير :)

عن بيتكم اللي لسه باعدي من تحته لما باتأزم قوي واعمل نفسي جاية اشرب عصير

عن كل الدلع اللي كان اصيل وبسيط ومن دون تكلف

عن ماتشات الكرة عند الحديقة الدولية وانا بارقصك وانت بتنكر يا جزمة

عن المذاكرة سوا ع الارض

عن اوضتي المكركبة دايما واوضتك اللي مافيهاش شي مش في مكانه

عن كوباية الكاكاو الخام ابو قرفة وشطة اللي افتكسناها سوا وخبيناها عن الكل طول السنين

عن قد ايه كانوا بيغيروا مني عشان انت مز ومش بتعبر حد غيري :)

عن لما رجعت اعيط اول مرة ركبت فيها مواصلات، فبقيت تيجي توديني الجيزة وترجع ع جامعتك وبعدين تيجي تاخدني ونروح

عن مصروفنا اللي كنا بنحطه على بعضه ونشتري بيه حاجات ونقسمها سوا، وانا طفسة وطماعة انت عارف

عن مصروفنا اللي كنا بنجري نبعزقه في يوم ف اسكندرية ونرجع باقي الشهر نتمشى ف الشارع واحنا ع الحديدة

عن يوم ما قلتلي أنت "Daughter of the sun" وسالتك يعني ايه وماردتش وبعدها ب3 سنين لما اتخانقنا اسبوع، قلت لي يعني الشمس بتيجي وياكي

انا في غياهب الجب

عن الدنيا اللي طول عمرها وسخة وبتلطش بس ماكانتش وسخة ولا عرفت تلطش مهما لطشت عشان انت ويايا

عن لما كنت ابقى over excited وانت تقعد تهري وتنكت في اني لسه زي لما كنت في اولى اعدادي وبالاقي امي حطالي سندوتش نوتلا واصرخ ف نص الحصة

عن لما كنت اقول كلمة قبيحة مش فاهمة معناها ووشك يحمر وتزغر لي وتقولي انا قلت لك 100 مرة بطلي ام شغل البغبغانات ده، انت عارفة معناها ايه دية؟

عن قد ايه انت الوحيد اللي فهمت انا قد ايه باخاف من المواجهة، واصلا جبانة، وباحب اجري بعيد واستخبى

عن الأهلي والزمالك والخناقات اللي ع الماتشات

عن لما كنت بالبس ولد واجي وياك الاستاد وتقولي لو سمعت نفس هاقوم اروحك، يا رجعي :P

عن لحظات الرضا التام وانت بتقولي "يا كاتيتا" ومحدش غيرنا فاهم معناها

عن لما كنا بنروح كافيه ويا صحابنا عشان يبطلوا زن وبعد نص ساعة تقولي باقولك ايه، مش طايق، قوليلهم لازم اروح وانا هاقول لازم اروحك ونطلع نتمشى

عن لما كنت اقولك عاوزة دي وتقولي انت تافهة وهايفة وهبلة ومش هتكبري وبعدين الاقيك جايبهالي وجايب لروحك زيها يا قلودة :D

عن طابور الصبح وانت بتبص عليا واول ما نطلع ع الفصل تقولي مش هتبطلي تنزلي من غير ما تغسلي وشك؟

عن لما قصيت شعري الا جارسون وقعدت تبرطم 3 ساعات وتقولي انا هاروح اطلع عين اللي اسمه سامر ده، ازاي يوافق يشيل شعرك كله كده؟

عن اني عمري ما فهمت انت ازاي ممكن تاكل 9 ساندوتشات ورا بعض، وبعدين تخش على ساندوتشاتي عشان مش قادرة اكمل يا طفس

عن لما كنت بتقولي Sade دي مش بتمشي ع الارض زينا كده وانا اقولك أف انا احلى طبعا، وتقولي ماشي يا هبلة، نمشيها انت احلى

عن لما كبرنا وكنا بنروح اكوابارك وتزقني من ع الزحليقة عشان نرجع عيال تاني

عن لما اشتريت لي فرشة شعر هدية وانا قلتلك قصدك ايه يعني، طب والله ما هاسرح شعري شهر! قال يعني كنت باسرحه اصلا :)

عن لما كنا بنطلع نتسلق الصخور في المقطم ونرجع متشخرمين وتقولي بتليقي في الشخرمة :) وانا اقولك دي مش كلمة اصلا، بطل استهبال

عن لما المانجا كانت تيجي من فايد واقولك وتيجي ونبهدل هدومنا ووشنا مانجا ونقعد نضحك على انك ماكلتش غير 8 مانجات بس النوبة دي

عن جيلاتي هاواي الشوكولاتة، اللي كان شبه الخازوق ده، اللي ماكنتش بالاقيه في اي حتة، والاقيك جيابهولي، واكتشف انك رحت مشوار ساعتين عشان تجيبه

عن اول لما دقنك بديت تطلع وانا باغلس عليك، وعنك وانت بتشتكيلي ان الافتر شيف ده حاجة يح ع الاخر

عن لما كنت تقولي نص ساعة ونزليلي السبت م البلكونة والاقيك ف الاخر حطيت لي نص بار شكولاتة واقولك طب النص التاني فين تقولي جعت فكلته ف السكة

عن لما اقولك اهلي مسافرين تعى نسهر برة وتقولي احترمي نفسك، ده بعينك.فاقول لروحي طب هانزل انا وانزل الاقيك ف وشي ع باب العمارة بتشاورلي ع فوق

عن غيرتك المجنونة من Sydney Carton وكرهك له من كتر ما كنت باحبه مع انه مجرد شخصية خيالية في رواية

عن الحظاظة الزرقا في موف، اول هدية جبتهالي واحنا عيال صغيرة، ولسه بالبسها وعمري ما ضيعتها مع اني باضيع كل شي

عن ب3 جنيه الا ربع بنزين من فضلك بمنتهى التناكة وضحكنا لحد الشخر والعياط، كانت اصيلة والله الكاتي كاتي اني مانو

عن اني اجبن من اني اقرا انا كتبت عنك ايه

عن انك كنت مقتنع تماما ان دماغي خفيفة لدرجة اني باسكر من الفيروز :)

عن كلبك اللي بيحبني وقطتك اللي بتكرهني عشان بتغير عليك مني، ماتحاولش تقنعني بغير كده!

عن كمية الشتيمة اللي شتمتها للغلبان اللي قالي "مش هتكون عمرها هينة فاهقولها زي ما هي، طارق مات يا سارة، انا والله العظيم اسف" اسفة يا كيمو

عن محاولاتك المستميتة انك تعلمني بولندي عشان افهم لما طنط مامتك تخبص عليا وانا زي القلة، واصراري ان دي مش لغة ده شخر

عن اصراري اني عمري ما اخلي موتك يكون مصدر وجع زي ما عمرك ماكنت بحياتك مصدر وجع :)

عن لما كنا بنروح المول نجري ورا بعض ونصرخ ع السلالم الكهربا عكس الاتجاه واحنا كبار وقد البغال

عن قد ايه انت صعبتها ع اي حد هييجي بعدك، بس عشان انت كنت حقيقي لدرجة انك ماحتاجتش تقول وهم بياعين كلام

عن الT-shirt اللي عليها Bugs bunny اللي كنا بنبدلها سوا لحد ما نسينا هي بتاعة مين فينا اصلا، انا مرة كنت زعلانة منك فقمت رميتها ف الزبالة :S

عن رفيق عمري، صاحبي الانتيم، حبيبي من دون ما نعترف بده، 12 سنة ماتوا من 8 سنين، وانا صحيت امبارح اكتشفت ده فجأة

عن "Love is all around, Wet Wet Wet" اول ما نزلت وماكنتش بابطل اسمعها وانت تقولي دي اغنية هبلة وبعدين لاقيت الشريط في الكاسيت بتاعك

ايوة عن الضفادع الصغننة اللي في الجنينة اللي ف ضهر المدرسة اللي كنا بنلعب وياها بالليل حتى بعد ما اشتغلنا

عن الوقفة ع المطب كل يوم، عن لما كنت بتشدني من ايدي ونلعب زحليقة ع المطب

عن لما طلعنا ع الصحراوي عشان اصرخ من كل الهم بتاع زمان، عن صريخك ويايا وقبلي عشان اتشجع

عن ساندوتش الكفتة المعفن اللي محدش غيرك يعرف اني كنت باكل منه 5 عادي من كتر ما هو حلو

عن لما كنا عيال والدنيا تمطر وننزل نلعب ونتغرق، عن لما كنا كبار وما بطلناش نعمل كده

عن انك عمرك ما كذبت عليا، ده انت حتى كنت قايلي انك بتحب تسمع عمرو دياب

عن لما باروح لامي واسالها بصوت واطي قوي "بتدعي لطارق واللا نسيتيه يا امي؟" فترد "انا كنت لسه هاسالك عليه من اسبوع بس خفت تزعلي"

عن اني لما كان حد بيعجبني، ويعدي عليا شهر من دون ما احكيله عنك، باتأكد اني اكيد عمري ما راح احبه

عن يوم ما كنت بتتخانق وجيت لك اطمن وفي نص الخناقة قمت مزعق روحي لحسن ياخدوكي سبايا حرب والخناقة اتفضت عشان الناس اتفشخت ضحك

عن أغانينا:

http://www.youtube.com/watch?v=x11NA63gLDM Eric Clapton - If I could change the world

http://www.youtube.com/watch?v=TQQ6SfPZggw Wet Wet Wet - Love is all around

http://www.youtube.com/watch?v=_ri96lDMe7E Savatage - I believe

http://www.youtube.com/watch?v=g24KJs3ektA Alanis Mourrissette - All I really want - Ha3 Ha3, I rocked ur world with my performance of this song, I know :)

http://www.youtube.com/watch?v=UYIDOiipxGE - الجيرة والعشرة - محمد منير

http://www.youtube.com/watch?v=apLhE_JpE2U سعاد حسني - شيكا بيكا

http://www.youtube.com/watch?v=w6DQavhJUrk Sade - No ordinary love

http://www.youtube.com/watch?v=9X_ViIPA-Gc Meat Loaf - I'd anything for love (But I won't do that)

http://www.youtube.com/watch?v=AQOVny5yvvE لو انت نار انا ميا - اوعى الشعبي البولندي :D

http://www.youtube.com/watch?v=cU5JAOIR2ys داليدا - حلوة يا بلدي

http://www.youtube.com/watch?v=SHoHIL2ABVQ The cranberries - Just my imagination

http://www.youtube.com/watch?v=y-64GH63qKw الغربة - اسماعيل البلبيسي

http://www.youtube.com/watch?v=vLBKOcUbHR0 John Denver - Leaving on a jet plane

We were living for the love we had and living not for reality :)

http://www.youtube.com/watch?v=EY0_oVV29PM The pretenders - I'll stand by you

http://www.youtube.com/watch?v=Krq86UiPtIQ Pink Floyd - The wall

http://www.youtube.com/watch?v=Qdapj0SDrE4 عمرو دياب - أحبك أكرهك

http://www.youtube.com/watch?v=pJhKztUXNfc Bon Jovi - Someday I'll be Saturday night - The most 

sang of all time :D

http://www.youtube.com/watch?v=wHOij4hJtJw Poor boy - Elvis Prestley

http://www.youtube.com/watch?v=0HL-N9oOjcs Not gonna get us - Tatu

http://www.youtube.com/watch?v=1JGHuF3zONE Dire Straits - Romeo & Juliet

http://www.youtube.com/watch?v=YgTazOHnTZE Stupid girl - Garbage

http://www.youtube.com/watch?v=aGmAmJFUvzM The Doors - The end

http://www.youtube.com/watch?v=HyrWd_gfQNQ Metallica - Nothing else matters - And the best is always for the last, and you have to let me go

أغانينا من بعدك

http://www.youtube.com/watch?v=jGKRXhmFQlw My immortal - Evanescence 

http://www.youtube.com/watch?v=RUmdWdEgHgk The cranberries - hen you're gone

http://www.youtube.com/watch?v=z8yYWvqyJJs James Blunt - Goodbye my lover

أنا آسفة :)