حبيبي الطالب: ميس ميس "ممكن اروح الحمام؟"الميس: بطل دلع و احترم نفسك
تمر خمس دقايق
حبيبي الطالب: ميس ميس ممكن اروح الحمام؟
الميس: معلش يا حبيبي استحمل، انت عارف تعليمات الادارة، طالما ما فيش دم، مفيش خروج من السجن، يوه قصدي المعتقل، اف قصدي الفصل
تمر عشر دقايق اخرى
الميس: حبيبي، ممكن تكلمني عن قانون الجاذبية؟
حبيبي الطالب (و نظرة البلاهة سائدة على وجهه): هه؟
الميس: مش قلنا تركز شوية، انت مش عاجبني النهاردة.
حبيبي الطالب: يا ميس مانا محصور، قصدي معذور.
الميس: معلش يا حبيبي، البلد كلها في حالة حظر تبول، انت ما بتقراش جرايد وللا ايه؟
تمر خمس دقايق اخرى
الميس في حديث مع النفس: "طب اذا كنت انا الكبيرة مش قادرة اركز عشان انا كمان عاوزة اروح الحمام، امال الواد يعمل ايه؟"
و في لحظة شجاعة
الميس: حبيبي، قوم روح الحمام
حبيبي الطالب: شكرا يا ميس انا بحبك قوي، ربنا يفك زنقتك
الميس في سرها: اللهم امين، ده الواحد تعب.
و تبدأ المعركة بخروج حبيبي الطالب من الفصل
مأمور السجن، قصدي أبلة النظرة، في الطرقة: انت يا ميس، المسجون ده، قصدي الطالب ده، مش في الفصل ليه
الميس: حضرتك الولد شاطر و حالة حظر التبول منعاه من التركيز
أبلة الناظرة لحراس الفصل: امسكوا الواد اللي هرب، رجعوه فصله!
و يعود حبيبي الطالب الى الفصل، بعد تدمير حلمه بدخول الحمام، مع ازدياد حالة الاحتقان.
شوية جد:
كيف لنا ان نأمل في تغيير مصر اذا كنا نقود الطلبة لكراهية الفصل الدراسي بحجة تطبيق القواعد و اللوائح و القوانين؟
هناك سببان محتملان وراء رغبة الطالب في الخروج من الفصل:
الحاجة الحقيقية، و لا داعي لذكر ما سيؤدي اليه حرمانه من هذه الحاجة، كلنا عارفين، ماحنا ياما اتزنقنا.
أو
كراهية الفصل و الرغبة في الهروب منه، و في هذه الحالة نحن في حاجة الى تطوير ادائنا و منهاجنا كي نعيد للانسان غريزة حب المعرفة.
أما ان يكون كل هدفنا هو السيطرة على الطالب، و ابقاؤه في الفصل، فهذا سيدفعه الى التمرد على المعرفة التي هي السبب الاساسي من وجوده في الفصل و هو بالتالي امتداد لثقافة المتعلم الجاهل التي نعاني منها جميعا.
أرجوكم، رفقا بحبيبي الطالب
امضاء
السجان العطوف
التدوينة ضحكتني، بس فعلا تنظيم خروج الأطفال ودخولهم وتحركهم دون الاضرار بالنظام محتاجة حلول عملية وتكتيكية.
ReplyDeleteاحنا لازم نعلمهم ينظموا نفسهم
ReplyDeleteمش لازم كل حاجة نعملها بالنيابة عنهم
و بعدين عن تجربة، انا كنت بافتح الباب في اول السنة و اقول للشباب اللي مش عاوز يحضر عشان يتعلم يخرج و مش متضايقة
و بيخرجوا و الفصل يبأه جميل قوي من غير اللي فاكرين انهم مش عاوزين يتعلموا
فكانوا بيتغاظوا و ييجوا يحضروا عشان الفصل جميل
هو الموضوع محتاج حد قلبه ميت و مش بيخرجهم استسهال
من و واقع خبرتى كطالب قديم من اكتر الحاجات اللى كانت بتخنقنى ان ممنوع دخول الحمام و الاجابه هو انت صغير يعنى مش عارف تمسك نفسك ما دخلتش الحمام فى بيتكوا ليه ؟؟؟؟؟ ايوه انا صغير مدخلتش فى بيتنا عشان مكنتش عايز ادخل ساعتها و فيها ايه لما ادخل الحمام عايز ادخل يعنى و الاسئله الرخمه بقى انت اتاخرت ليه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ حاجه تشل والله
ReplyDeleteالموضوع حلو فكرته ممتعه الاسلوب بيشد ان الواحد يكمل على الرغم من الاحداث عاديه و صلتى لفكرتك باسلوب سهل تحياتى
ويبقى السؤال: {how to control them} بس المشكلة بقى .. على فكرة مش لازم خالص .. مش مفروض اي حد يتحكم فى اي حد .. مش مفروض خالص
ReplyDelete