ولاد ناس

يوم الخميس

أنا من شباك المنور: ام علاء اطلعي لي ثواني من فضلك

أم علاء: السلام عليكم، خير حضرتك؟

أنا: وعليكم السلام، خدي يا ولية شوية السمك دول للعيال

أم علاء: تسلم ايدك، كلفتي نفسك

الجمعة

البوابين جيران ام علاء في 3 عمارات: تسلم ايديكي يا مدام على السمك

أنا في عقل بالي: هه؟ سمك ايه ده؟

أنا بصوت عالي: أم علاء خدي لما أقول لك

أم علاء: نعم يا مدام؟

أنا: هو أنت اديتي السمك للجيران؟ ما عجبكوش؟

أم علاء: لا والله دي كانت أكلة زي الفل. أنا بس قلت ناكل كلنا وربنا يبارك.

نرجع للسمك، دول 3 سمكات بلطي مشوي، وأم علاء وجوزها وعلاء ومحمد 4، يعني على حسبتي، الكبار كل واحد سمكة والصغيرين كل واحد نص سمكة.

امال ال 3 عيلات في 4 دول اكلوا ايه؟ وبعدين انا عارفة جوزها، مش هيطلع اللي جايله بالساهل كده.

أنا: أم علاء، هو أنت عزمتي الناس على السمك ازاي؟ سعداوي ما مانعش؟

أم علاء: لا يا مدام ما انا قلت له المدام قالت لي اعمل كده.

أنا في عقل بالي: أحيه أحيه أحيه، هم دول الحوش الرعاع؟ طب أنا من النهاردة هاستقتل فيها عشان ابقى حوش رعاع. و من يومها ام علاء بقيت صاحبتي الروح بالروح. عشان انا قررت اتعلم البني آدم بيبقى ازاي.

§        أم علاء لما ايدي جالها تمزق في الاربطة كانت بتطلع تغسل لي المواعين وتحلف ما هي واخدة فلوس.

§        أم علاء لما مشيت بتبعتلي زبدة وبيض وبط وفراخ بلدي مع ان جوزها طفش وماعندهاش مصدر دخل. وبتقول لي بيتها في المنيا جميل ولما زنقت ابنها في الكلام قال لي عندنا في الاوضة فرشة ولمبة. كل ده عشان هي حافظة لي جميل، كنت محتارة هو ايه لحد مع اكتشفت (مع خالص الاسف) ان الجميل هو اني عاملتها على انها بنت ناس.

§        أم علاء كل ما تكلمني تسأل عن أي حد زارنا في البيت واداها اي 10 جنيه وتدعي له.

§        أم علاء قبل ما اتحجب ما كنتش بتقول عليا ساقطة ولما اتحجبت فرحت لي من غير تكلف. يعني معندهاش معيار للحكم الفوري على البني ادمين.

§        أم علاء لما حصلت لي مشكلة صحية كبيرة، كانت بتعيط عشان انا في رأيها ست طيبة وباحب الخير للناس.

§        أم علاء بتحسسني اني ملاك او قديسة لاني باحسسها انها بني آدمة. انتوا فاهمين المفارقة دي اد ايه مؤلمة وتعيسة؟ يعني هي بني آدمة دي حقيقة مثبتة و موثقة بشهادة ميلاد، فلما اعاملها انا بناءا على حقيقة، ردها يبقى ان ده خيال!!!! أنا مش ملاك، انا اصلا مجنونة وعصبية ومابيعجبنيش العجب وعدوة نفسي وعندي حب سيطرة وعايشة في عالمي الخاص اغلب الوقت باحلم. يعني فيا عبر الدنيا. وهي شايفاني ملاك لاني اديتها ابسط حقوقها. ليه كل الظلم ده؟

المهم، ندخل في الموضوع بعد المقدمة الطويلة العريضة دي.

 في ناس بتقول لفظ كده عجيب غريب مريب، في رأيي هو اساس الكارثة المجتمعية اللي مصر بتمر بيها، واللي انا حقيقي مش عارفة ابعادها ايه. باين كده بيقولوا على بعض الناس انهم "ولاد ناس".

أنا: طبعا ولاد ناس، أكيد ولاد ناس يعني، أكيد باباهم مش قرد ولا مامتهم معزة.

وبعدين قمت قولت في عقل بالي، بطلي هبل وارجعي من العالم الموازي الخيالي بتاعك وواجهي الحقيقة. طنطنطنطان. قصدهم ولاد ناس يعني بيشتغلوا في ملتي ناشونال وبيتكلموا انجليزي وعندهم عربية كيا سيراتو وشقة في مصر الجديدة وبيروحوا غزالة عشان مارينا لمت وبيعملوا شوبنج في سيتي ستارز و كارفور وشرحه.

قمت لما رجعت العالم الحقيقي اتغظت قوي، وتقريبا اعصابي فلتت. فقلت اما اروح تاني العالم الموازي.

في العالم الموازي، ولاد الناس اسمهم "الطبقة المتوسطة". واللي اسمهم بلطجية ورعاع في العالم الحقيقي اسمهم "الطبقة الكادحة".

في العالم الموازي، الطبقة المتوسطة بتعمل الحاجات دي:

·        ما بيقولوش على نفسهم ولاد ناس.

·        قبل ما تنام بتتأكد أن البواب وعياله مش نايمين جعانين.

·        لما يروحوا يشتغلوا بيسألوا نفسهم الاول، الشغل ده بيساهم في تحقيق العدالة الاجتماعية ولا بيتسبب في زيادة الفجوة بين الغني والفقير.

·        بينزلوا العشوائيات مرة كل شهر، يطبطبوا على حد و يشرحوا له حقوقه وازاي ياخدها. ويا ريت ياخدوا معاهم حاجة في ايدهم.

·        بيركبوا ميكروباص ومترو واتوبيس ومنيباص مرة في الشهر ويتكلموا مع الناس عشان يعرفوهم. ويحبذ انهم ما يكونوش لابسين الحتة اللي على الحبل عشان من تواضع لله رفعه.

·        لما بيروحوا كارفور يبضعوا للشهر، بيجيبوا للبواب شوية خزين وفرخة.

·        ما بيدوش للبواب 300 جنيه مرتب ويدوله صدقة 50 جنيه من كل شقة. بيجمعوا الكم 50 جنيه دول ويدوها له مرتب ويحفظوا له كرامته.

·        لما حد يتكلم معاهم عن معاناة الفقرا ما بيردوش الرد اللي بيصيبني بخلل نافوخي تتراوح مدته وحدته من 3 ايام لاسبوع من عدم الخروج من البيت إلى التزام السرير. الرد هو: أصل هم متطلبات حياتهم غير متطلبات حياتنا. يعني هم عاوزين اريال يدوي وطشت واحنا عوزين اريال اوتوماتيك وغسالة فول اتوماتيك؟ اه اه هم بيموتوا في الشقا، بيعشقوه عشق. بيكرهوا الراحة والنضافة والبراح والعلام والكرامة. في العالم الموازي الطبقة المتوسطة ما بتنامش بالليل غير لما تتأكد إنها عملت حاجة النهارده عشان حياة الناس دي تبقى أفضل.

·        ما بيروحوش يصيفوا في الساحل ويشتوا في شرم واسوان والجونة. كل فسحة بيروحوا حتة في بلدهم ما راحوهاش قبل كده لو يقدروا. يتعرفوا على الناس ويثقفوا نفسهم على الارض.

·        ما بيقولوش يا مامي الاخوان والسلفيين بياكلوا الودان ويخطفوا الستات ولازم يحبسوهم ورا الشمس.

·        ما بيقولوش الاشكال دي ما ينفعش معاها غير حبيب العادلي.

·        ما بيقولوش الشعب المصري جاهل وما يستحقش الديمقراطية. لازم يتحكم بالكرباج.

·        لما بيشوف واحد غلبان هدومه مشحمة وريحته مش أد كده، ما بيبصلوش من فوق لتحت ويقول في نفسه: يا ربي توب علينا بأه من المناظر دي. ربكم بأه رسوله صلى الله عليه وسلم قال ايه في النقطة دي: "رب أشعث أغبر لو أقسم على الله لأبره". يعني منكوش ومعفر وحالته كرب، ممكن يكون عند الله أحسن من اللي لابس ومتقمع.

·        بيتعلموا دينهم ويعلموه للناس عشان ما حدش يفهمهم الدين غلط او يستغل فقرهم.

·        ما بيقيسوش الناس بمدى اتقانهم للغة الانجليزية. وما بيرطونوش مع الناس وهم متأكدين انهم مش فاهمينهم لاثبات فوقيتهم.

·        لما بيشوفوا حد غلبان عامل فيها متشيك، بيحمدوا ربنا انه أنعم عليهم بالمال بدل ما يتريقوا عليه ويقولوا بيئة قوي أو بلدي قوي يا حسين.

·        بيبقوا عارفين ان الشغالة والسواق والبواب موظفين عندهم مش عبيد. يعني زي ما يحبوا مديرهم يتعامل معاهم، يتعاملوا هم مع الناس دي.

·        بيكلموا ولادهم عربي، وما يبهدلوهمش لما يفجروا ويتكلموا عربي.

·        في الاجازة بيخلوا ولادهم يلعبوا مع ولاد البواب في الشارع مرة في الاسبوع، عشان الولاد تطلع متواضعة وفاهمة ان دول باردو ناس.

·        بيضحكوا في وش كل الغلابة ويقولولهم حضرتك لو كبار، ومن فضلك لو في عمرهم، ويا حبيبي لو صغار.

·        بيذاكروا للولاد اللي في منطقتهم ويروحوا المدارس بتاعتهم يسألوا المدرسين هم عاملين ايه. عشان المتابعة دي بتفرق جدا في نفسية العيال ومع المدرسين كمان. نوع من الرقابة الشعبية بهدف اصلاح التعليم.

·        لما بيشوفوا حد بييجي على حق الغلبان بيدافعوا عنه، مش بيقولوا وانا مالي. او يحسوا من جواهم ان الغلبان يستاهل، هو بيكلم اللي احسن منه (سيده يعني) ازاي؟

·        لما حد بيدافع عن حق الغلابة في الحياة ما بيقولوش عليه أكيد شيوعي، شيوعي هنا من وجهة نظر شريرة جدا، انه لازم يروح المعتقل لانه خطر على المجتمع. ازاي يعني ماعرفش. في العالم الموازي بيقولوا عليه بني آدم ولو مش قادرين يساعدوه على الحق بيدعوا له ربنا يقويه ويحفظه.

·        لما بيشوفوا حد عليه السمت الاسلامي ما بيتخيلوش انه نصاب ومدعي ومتطرف ومضحوك عليه وما بيعملش حاجة غير صلاة وصوم وما عندوش اخلاق. عادي يعني ممكن يكون مظهره متدين وداخله (اللي هو لله وحده الحكم عليه) متدين باردو. ممكن يكون بيحاول.

·        لما بيعملوا انترفيو لحد في الشغل ما بيبصوش على هدومه ويحددوا بناءا عليها ينفع ولا لا. يعني ما ينفعش حد يكلمني في التليفون يقول لي السي في بتاعتك هايلة ولما يقابلني ويلاقيني لابسة عباية يقول لي انت متأكدة ان السي في دي بتاعتك؟ لا حضرتك انا باشتغل بعد الضهر كدابة وجاية اهرج. ويفترض كمان اني ما باكلش ولا عندي فاتورة كهربا ولا عاوزة اعمل اي حاجة بتحتاج فلوس، على اساس اني لابسة عباية واكيد يعني كل اللي باعمله اني باصلي في الضلمة وماحدش بياكل وهو بيصلي.

·        ما بيقلش العرب جرب. كفانا بقى عنصرية. عندهم حق الامريكان يقولوا العرب بربريين لو احنا بنقول جرب. بس الامريكان المصريين عندهم عرب، لو مش عارفين يعني.

·        ما عندهمش هوس الديزاينر والسينييه.

·        مشكلتهم مع الثورة ما تبقاش ان الحظر مخليهم مش عارفين يخرجوا براحتهم أف بأه.

·        بيتوجعوا لوجع الناس في العالم كله. فلسطين، العراق، ليبيا، سوريا، اليمن، باكستان، كوبا، الفلبين، بلاد الواء الواء.

·        و أهم من ده كله، بياخدوا أم علاء بالحضن، ويدافعوا عن حقوقها ويعلموها ويراعوا ولادها ويقدروها ويفهموا انهم هم كمان هيتعلموا منها كتير. يعني ماحدش احسن من حد.

ومني لأم علاء، أنت أحسن من أي واحدة لابسة شنطة لوي فيتون مضروبة اساسا وبتشرب فرابيه في ستاربكس وتتغدى سمون فوميه في كاسبر اند جامبينيز وهي من جوه يا كلها غل  و بتعاني من الفوقية. سطحية حتى الثمالة.

الكلام هنا مش على كل الطبقة المتوسطة. الكلام على فئة منهم بتعمل كل ده وتستحرم ان الغلابة يعوزوا يعيشوا.كل ده حلال وحلو وانا باعمل حاجات منه، اللهم الا لوي فيتون، لاني ولا مؤاخذة حرة ماليش ماركة. حلال وحلو بس لما يتحول لحلال لنا حرام عليهم لانهم رعاع بيبقى مقزز.

والختام، أنا باحب أم علاء ونفسي تعيش حياة كريمة. ليه ده صعب قوي ان حد يفهمه؟ والله أم علاء بنت ناس. أنا قابلت أهلها واتأكدت بنفسي انهم ناس.

خالتك فئوية وخالتك فوقية بيقولولك ليه تعتصم لما ممكن تتبلطج؟

الهدف من اي اعتصام هو توقف العجلة المقدسة، عشان اللي سايق العجلة يفهم كويس قوي قيمته ايه وان اهم حاجة في العجلة الكوتش فلازم يبقى متكلف. فحجة توقف الانتاج دي اللوم فيها على اللي مصر انه يطير بالعجلة من غير حتى ما يهتم بالكوتش. الناس بقى عاوزة الكوتش ينفخ نفسه عشان السواق بدلته شيك وغالية.

بما ان الموضوع مثير للاعصاب، مش ههزر خالص، خاصمت الضحك بسبب خالتكم فئوية لما طلعتهم مجرمين وقررت تحبسهم.

نبدأ بالجوع، نشوف بيعمل ايه في الناس

عارفين في رمضان بنبقى عصبيين ومش مركزين وكل اللي في دماغنا الجوع ازاي؟

هو ده حال الفقرا طول الوقت. بس احنا بنبقى عارفين ان وقت الاكل هنلاقيه، مش كمان نش عارفين هنجيبه منين.

واحد غلبان قال لك الاتي:

طب انا موافق اجوع بس عيالي، يجوعوا ليه؟ دول...عيال.

طب اعمل ايه؟ اروح للحكومة تزود لنا المرتب أو ترخص لنا الاكل.

وبعد ما رحت وقابلوني بمنتهى التناكة، رجعت للعيال من غير اكل وباردو كانوا بيعيطوا. طب اعمل ايه؟ مش قادر استحمل. قربت ادعي عليهم ربنا ياخدهم لان ابوهم مش لاقي يأكلهم.

هاجرب حل اخير، انا هاروح اعتصم قدام الحكومة لحد ما تشوفلها صرفة.

بس بيقول لك الاعتصام جريمة. حبس ونيابة وكفالة وياحزنون.

طيب توكلت على الله. انا هاروح اشوف لي اي سلاح واشتغل بلطجي بعد الضهر عشان اعرف اجيبلهم اكل ويبطلوا عياط.

- طيب نسيبنا من الجوع ونخش على العلاج.

واحد اتكسح من الشغل، وبيدفع تأمين بس مافيش علاج. مطلوب منه ايه يعني وهو منصوب عليه؟ يسقف ويهيص؟

طب لو سقف وهيص باردو هيفضل مكسح. والمكسح ما يقدرش يشتغل. ولو ما اشتغلش مش هيلاقي حتى الجوع نفسه.

- طب التعليم، المجاني ابو فلوس كتير ده، هو ما يتعلمش احسن فما يعرفش حقوقه، فيفضل ساكت وما يقرفناش. وكل شوية يتجر على القسم يتهتك عرضه ويفضل ساكت. واحد الناس شايفة انه عادي يجوع ويتكسح، اكيد هيشوفوا ان عادي انه يتعذب.

بس بقى هنا نقف وقفة سريعة تقيلة كده، اللي بيعذب بيتعود على السادية، ولما يمارس السادية على الغلبان الساكت، الممارسة هتفقد لذتها، فهيبدأ يدور على الاقل غلبا يهتك عرضه وآدميته باردو.

واللي راضي بالظلم لغيره عشان مش طايله، يستنى الدور جي عليه. اعتبروه العدالة الالهية.

وبعدين التعليم يضمن اني اشتغل وانا فاهم حقوقي كعامل او موظف، وانتم عاوزينهم يتعلموا؟ يعني هم كمان ياخدوا زيهم زيكوا كده؟ او ياخدوا اللي يكفل لهم آدميتهم وكرامتهم؟ امال خالتكم فوقية اجتماعية هتهاجر يعني؟

في منظوري، الحرية هي القدرة على اتخاذ قرار مبني على قناعة. بغض النظر القرار صح ولا غلط. اي حد جعان وعيان و جاهل بفعل فاعل ومهتوك عرضه قراراته كلها مشوشة ومتضاربة، لانه فقد مقومات الحرية.

*عالم الاجتماع ريتشارد كويني توصل إلى نظرية تلخص القوانين في صورة سلاح يستخدمه اصحاب السلطة والمال ضد الفقراء لضمان حفاظهم على مكتسابتهم وضمان الزيادة المستمرة لها.

كفايانا بقى ضحك على الدقون ونقول مسئولية المجتمع المدني مساعدة الفقرا. بنفرح قوي لما نطلع صدقة نديها لفقير؟ عن نفسي بافرح، بس بافرح اكتر لما اساعده يعيش مكفي نفسه ومش محتاج صدقة. صعبة قوي دي؟ ولا هتاخد مننا فوقيتنا الاجتماعية؟

انا زهقت من الكلام، الحقيقة كل دي حجج فطرنا عليها مش محتاجة اني اقعد اقول واعيد فيها. يا ريت كل واحد موافق على تجريم الاعتصام يراجع آدميته. ويحاول يحط نفسه مكان الناس الغلابة شوية.

- يا حكومة ويا مجلس: مباركستان انتهت، وعسكرستان وشرفستان هيحصلوها في اسرع وقت، الحق دايما اقوى لانه لا بيتفاوض ولا بيقدم تنازلات ولا بيشحت حقوق ولا بيقبل وصاية ولا بيخاف ولا بيقضيها من تحت الترابيزة.

يا شعب مصر، مصر مش ارض، مصر ناس، لو الارض جنة والناس جعانة وبتتعذب وممنوع تقول آه، هتبقى زي ما هي مخروبة وكلنا مخنوقين منها.

يا شعب مصر، ما حدش احسن من حد. كفاية طبقية وفوقية وعنصرية.

يا شعب مصر، الرحمة.

يا شعب مصر الكادح: أنا باردو آسفة.

فئوية دي تبقى خالتك

أحدهم: معلش يا جماعة، سكوا على طلعة الساحل الويك اند دي، اصلي مش معايا غير 500 جنيه. خلونا الاسبوع الجاي يكون اول الشهر جه.

أحداهن لأحدهم آخر في بيئة اخرى:

-         يا رجل ما تعتصموا لحد ما الحكومة تشوف لها حل.

-         انت اتجننتي يا ولية؟ عاوزاهم يقولوا عليا فئوية؟

-         فئوية ايه ياخويا؟ فئوية دي تبقى خالتك. وبعدين فئوية فئوية، ما عدناش لاقيين الفول.

4 انفار * 3 وجبات * 2 شندوتش (1.5) * 30 يوم = 540 جنيه

الايجار 200 جنيه

والانبوبة 40 جنيه

و الكهربا 20 جنيه

مش مكملة ياخويا، هو انا باقولك روح اعتصم عشان نفسي في لحمة؟ انا عاوزة فول. انا متبترشي على اصلي ابدا. بس والله ما فاهمة، هم ليه عاوزين ياخدوا مننا الفول؟

انت تروح مع صوحاباتك وتقولوا عاوزين فول. اه هو ما فيش غير كده حل.

-         يا ولية غوري من وشي، هو انا لاقي فلوس المواصلات عشان اروح الشغل عشان اتجنن واروح اعتصم ويخصمولي ايام الغياب؟

الاعتصام ده لولاد الناس اللي يقدروا على الخصم. انما احنا خلينا نشوف لنا صرفة في العيال، هم يعني لازم ياكلوا 3 مرات في اليوم، يا خي ده حتى خليهم يبقوا زي ولاد الذوات، ما هم على طول عاملين روجيم.

-         ياخويا استرجل شوية، قال ضربوها على عينها، قالت عورة عورة. شوف بقى ان ما رحتش، انا هانزل اروح اعتصم مع زملاتك. وزي ما يكون يكون.

-         يا ولية يا مخبولة، هو انت بتشتغلي هناك؟

-         لا، هاقلهم جوزي بعافية شوية وبعتني اعتصم مع زملاته بداله، عشان هو ما يهنش عليه يتخلى عنهم في وقت زي ده.

-         جرى ايه يا ولية؟ هو انا مش مالي عينك للدرجة دي. طب انا هاتنيل انزل ومش راجع غير لما اجيب معايا فلوس الفول.

-         لولولولولوي...يخليك لينا راجل. منصورين ان شاء الله. يا عيال، ادعوا لابوكوا يرجعلنا منصور ومعاه الفول.

*  استعراض للاراء حول هذا المطلب وردي عليها بصفتي انسانة مش أكتر:

§       النخبة – المطالب الفئوية خطر على الثورة. وبعدين مالناش دعوة قلنا الدستور أولا.

§       الحكومة والمجلس – احنا محتاجين وقت لتحقيق كل المطالب الفئوية.

§       نجيب سويرس والرفاق – انقذوا عجلة الانتاج، عجلة الانتاج في خطر، الكاوتش، الحقوا الكاوتش. العجلة ما بقيتش مريحانا. احنا عاوزين فلوس. نقصد انتاج.

§       شعب كارفوروسيتي ستارز والساحل – مش ممكن الناس دي، ولا بيشتغلوا ولا بينيلوا حاجة وبس فالحين يعترضوا ويعطلولنا المرور. وريحتهم ياي فظيعة.

§       شعب مصر الجميل اللي هاود لحد ما بقى الفول يطلق عليه مطلب فئوي – لقد ورمنا ورمنا، ومش لاقيين الفول ياللي مابتحسوش.

§       جزء سليم الفطرة من الطبقة المتوسطة (بما يضم من يساريين واسلاميين ولا منتمين) – عاش كفاح العمال، انما تنصرون بضعفائكم، ازاي في ناس عايشة كده؟ انا حاسس بذنب رهيب. وفي الغالب الجزء ده هو الجزء الكادح من الطبقة المتوسطة، المنتمي لها اجتماعيا، اما ماليا فهو يشعر بانه قريبا سيشاركهم في هذا المطلب الفئوي السامي: عاوزين فول. ولكن فرصه احسن لانه مسلح بتعليم لا بأس به.

§       أمي حبيبتي - والله ده حرام. غلوا الزيت على الناس. يعني الصابون هيغلى والشامبو هيغلى. هم ليه مش عاوزين الناس تستحمى؟ دي النضافة نعمة كبيرة.

     *  أنا وأعوذ بالله من قولة أنا:

§       للنخبة – على رأي الولية، فئوية دي تبقى خالتك ياخويا. الفول مطلب شعبي، الشعب يريد فول، وادينا ضحينا بالطعمية لان الزيت غالي. وطظ في ثورتكم اللي مطالب العمال والغلابة فيها اسمها مطالب فئوية. اخر مرة حكولي عن الثورة، زييها زي اي ثورة، كانت المطالب الفئوية دي اسمها عدالة ولامؤاخذة اجتماعية. وأي حد قاعد في استوديو مكيف بيتكلم عن ثورته من غي ما يفهم ان لولا الناس الحرانة العرقانة، كانت الحكومة فطسته، يبقى محتاج ينزل يتحر ويجوع شوية.

§       للحكومة والمجلس – ده انعدام كفاءة او طرمخة. شوفوا في كل وزارة او هيئة او مؤسسة مؤسسة في كم واحد بياخد له 50000-60000 الف جنيه، وشوفوه بياخدهم ليه، وشوفوا اللي بياخدوا اكتر (مش لاقية القدرة على ذكر الارقام لان من الصعب عدم التلفظ بالفاظ عيب عيب عيب الصراحة). واعيدوا توزيع الاجور. مش محتاجة وقت يعني. اعادة التوزيع بالموارد المتوفرة.

§       لنجيب سويرس والرفاق – هو ازاي بقى كده؟ ازاي في ناس كلحة كده؟ الحقوني، عجلة الانتاج فيها خرم، بالمنظر ده انا مش هاقدر اكمل بالعجلة دي في السباق بتاع فوربس. مش هاقدر اوصل لمركز متقدم. الكاوتش فسا. عااااااااااااااا. ياخي والله ده لو الثورة قامت بس عشان نخلص من امثالك كان يبقى كفاية. بس انتوا ايه لازقين بغرا، الملياردير الثوري والرفاق المليونيرات. وطبعا انا عندي حقد طبقي. نفسي يبقى عندي يجي 100000 جنيه زيكم. فككم من العجلة شوية. احنا الشعب اصلنا عاملين جمعية وهناخدها اخر دور وإن شاء الله ناويين نجيب بها عربية نركبها بدل ما انتم ذالين أنفسنا بعجلتكم دي.

§       لشعب كارفوروسيتي ستارز والساحل – بليز بي اند لت ذم بي، انتوا عاوزينهم يستحملوا الحياة من غير فول حتى، وزعلانين منهم قوي عشان عاوزينكم تستحملوا الزحمة؟ حاجة هوريبول فعلا. ناس كل امنيتها توفر لعيالها الفول وانتوا زعلانين قوي عشان ياي ريحتهم وحشة وعلى طول مكشرين وبيقولوا blease ya modam . إخي بجد، هم مايعرفوش ان اسمها please madam . اخس عليهم. وكمان مش منتجين، بيستهلكوا بس. لا لا لا. الحكومة فعلا لازم تشوف معاهم حل. فعلا كان حبيب العادلي مظبط مصر. ومن كل قلبي باقولوكم، إلهي كل واحد الرحمة اللي في قلبه اتنزعت، يجيلوا يوم ومايلاقيش ساندوتش الفول عشان نشوف ساعتها ضحكته الحلوة هتقلب بتكشيرة ولا لا. وهينتج ولا لا. زعلانين عشان سلوكهم مش حضاري خالص. علموهم. اه علموهم. 3 ساعات من كل اسبوع لتعليم الغلابة. كوميونيتي سيرفيس، يو نو؟ حاولوا تنزلوا لارض الواقع وتفهموا ان دي بلدنا كلنا. ما فيش مكان للشكوى، شغل بس في كل حتة لتحقيق العدالة الاجتماعية. واللا خايفين الروس تتساوى؟

§       لشعب مصر الجميل – أنا بجد آسفة.

§       للجزء سليم الفطرة – استمروا، إلى الأمام، إلى الأمام، ثورة ثورة. اتحدوا ولاتتفرقوا مهما اختلفتوا. ساندوا العمال، بكل الطرق المتاحة. انزللهم واللي ما يقدرش يفهم اللي حواليه ان النخبة بتضحك عليهم وتقول مطلب فئوي مع انهم عاوزين فول. فهموا العيال الغلابة اللي في المدارس انهم كمان لهم مطلب فئوي جدا فئوي خالص فئوي اوي اسمه التعليم، يمكن يتعلموا فييجي اليوم اللي نساندهم فيه عشان مطلب فئوي أكبر زي اللحمة. أنتم الأمل. ولله عباد يسخرهم لخدمة عباده. يا رب نبقى كلنا منهم. والجزء ده انا عارفة انه هو اللي بيطحن نفسه فعلا في الشغل. استمروا وما تخلوش حد يحبطكوا. هو ده غاية المراد.

§       لأمي حبيبتي - ربنا يخليكي ليا. ولينا كلنا. بس الناس دي مش لاقية ميا اصلا فموضوع الصابون والشامبو ومعجون السنان ده هيحطك تحت طائلة القانون النخبوي بتاع المطالب الفئوية. واستمري في التبرع للغلابة بأدوات النضافة الشخصية عشان ما ينسوش ان ده كمان حق من حقوقهم. وعيب لما يبقى مطلب أصلا.

                                                        والله الموفق والمستعان

فتش عن الحقيقة وطفي التليفزيون

طب وليه بس التعب ده؟ ما احنا من غير ما نفتش الكلام على هوانا، يعني من الاخر عاوزين نصدقه.

بس المشكلة الاساسية ان ربنا سبحانه وتعالى أرسى سنن كونية لم يفرق فيها بين مؤمن و كافر.

و على الرغم من أن الايمان في هذه الحياة هو الهدف من وجودها، الا ان هذا الايمان لا يوفر للمؤمن اي صورة من صور خرق هذه السنن الكونية لصالحه أو حتى لصالح هدفه السامي، غير ان هذا الايمان يأخذ بيد المؤمن الى السكينة ليقينه بأن هذه الحياة ليست الا للزوال.

هذه السنن الكونية تقوم على قواعد و حقائق ثابتة.

ماذا يحدث ان فسدت المعطيات؟ فسدت النتائج والنظريات و بالتالي الحلول.

يعني من الاخر، الحقيقة مش مطلب ترفيهي، بل هي مطلب شرعي لكل من يريد ان يبني حكما ليتخذ موقفا صحيحا مما يحدث حوله لعل الله يوفقه بهذا الموقف الى خيري الدنيا والاخرة.

هل يعقل ان الحقيقة تقتضي ان احد الاطراف دائما على صواب؟

هل يعقل ان الحقيقة تقتضي ان كل من يطلب الحق بالضرورة يطلبه بحسن نية؟

هل يعقل ان الحقيقة تقتضي ان من يقول الحق احيانا يقول الحق دائما؟ علما بان سياسة كل من يريد ان يصدقه الناس في الباطل يبادر دائما بقول الحق حتى ينال ثقة الناس فوقتما بدأ في قول الباطل لم يفتش وراءه أحد.

هل يعقل ان نقبل الكذب لان الحقيقة قد تفتح ابواب التساؤلات؟

هل يعقل ان ننقاد من فتي صغير الى فتي كبير؟ باردو دون فهم او اطلاع بل أزعم انه دون دراية سابقة؟ ايه رأيك في النظام الرئاسي الامثل لمصر؟ ايه رأيك في الطريقة الامثل للاستفادة من مشروع توشكى؟ في رأيك ما الحل لمشكلة مياه النيل؟ سبحان الله، كلها اسئلة تقنية لا يمكن الاجابة عليها الا بعد دراسة و يفضل ان تترك لاهل التخصص مع محاولتنا الدائمة للاطلاع. بس الكل يحب يشارك يعني. ما هو اصلا "شيرينج ايز كيرينج" يا باش مهندسين.

هل يعقل ان يصبح الانسان صاحب رأي في كل شيء؟

هل مصدر المعلومة لا يعنينا اطلاقا؟

هل منطقية المعلومة، وان حسن المصدر، لا تعنينا اطلاقا؟

شوية امثلة للمعضلة:

1. سلفيون يقطعون أذن مسيحي اقامة للحد  - الخبر الحقيقي: 10 أفراد من بينهم 1 سلفي اتخانقوا مع جارهم اللي بيأجر شقته مفروشة، فين بقى؟ في الصعيد. ثم ان قطع الاذن مش حد اساسا. يعني من غير معلومة 10 بينهم واحد سلفي مستحيل يكون الخبر ده حق او يراد به حق. دي الصعيد يا ناس.

2. 2000 سلفي يهاجمون د. البرادعي في المقطم – 2000 سلفي؟ مش هاتعب نفسي واقول كان فيهم واحد بس بدقن لان انا اصلا من المقطم و عمري ما شفت الالفين سلفي دول. جمهورية المقطم جمهورية اخوانجية.

3. مبارك يعتذر من الشعب ويطلب العفو على قناة العربية – لا حقيقي فعلا لما ابقى بحاول اثبت لابويا ان مش انا اللي خلصت برطمان النوتيللا هابدأ بأني اقول له انا اسفة، سامحني.

4. المظاهرات كلها سلمية تماما – من يبحث عن الحقيقة سيتأكد من عدم صحة المعلومة و عن تورط بعض المتظاهرين في الهجوم على الاقسام. السؤال بأه هل معنى ده ان كل المتظاهرين شاركوا في الحرق؟ فريق ضد الثورة يقول: كلهم شاركوا .و فريق مع الثورة: ما حدش شارك. وأنا اقول: أما الصراحة فأمرها سهل لكن لا تجلب مال ولا تصون عرض، عجبي. يعني انا باقول كده و انا نزلت يوم 28، هل ده معناه اني شاركت في الهجوم على الاقسام؟

5. لا لترقيع الدستور – الكلام هنا للنخبة المثقفة بتاعة التليفزيون و الجرايد وبتاعة "ادوا للاحزاب بتاعتنا وقت"، يعني الكلام لليسار وده تيار أكن له الاحترام و ان لم اتفق معه لانه زهقني بتنظيره الخرافي و لاني متأكده ان الاشتراكية فشلت اكتر مما نجحت. نعم بأه حضرتك؟ ايه التضليل ده؟ الدستور سقط لان وجود الجيش غير دستوري. يعني الدستور بخ. و الاستفتاء كان على حاجتين: شرعية وجود الجيش، فاللي مش عاجبه وجود المجلس، يقاطع الدستور. و بعدم وجود اي دعوة لهذا من هؤلاء الذين اعلم جيدا انهم يفهمون تماما ما أقول، تأكدت من ان خدعة لا للترقيع ما هي الا وسيلة لكسب الوقت لتشكيل الاحزاب. في مقال مهم لد. ليلى سويف في هذا الشأن للي مهتم، و هي يسارية قديمة و تقيلة ومحترمة كمان. اما عن الترقيع، فإذا كان من المعلن ان الدستور سيعاد تشكيله في الحالتين، امال هنرقع ايه؟ مش قادرة افترض في النخبة المثقفة الجهل فمضطرة اتساءل عن نواياهم.

6. الدعوى الحالية لاسقاط المجلس العسكري وابداله بمجلس رئاسي مدني يتكون من 5 افراد – و لا مؤاخذة في اللفظ "كنت فين يا خشب لما كنا نجارين؟" يعني اللي بيعمل كده بعد ما 18 مليون مواطن هو منهم لأني هفترض انه قال نعم او لا، اقروا بشرعية وجود الجيش، بيناقض نفسه.  و ناسي ان 77% اختار وجود المجلس كقائد للمرحلة الانتقالية. ده غير ان بتوع لا كمان اختاروا كده بالضمنية. في شوية ناس، اصرت على البقاء في الميدان بعد خطاب عمر سليمان، في رأيي مع قلة عددهم، دي الناس الوحيدة من اليسار اللي بيلعبوا سياسة بجد. الباقي مكسل يتعب نفسه وبيردد اراء بهلوانات الجهاز التلفيزيوني اللي اصبح من اكبر مولدات الغباء في البلد.

7. اسرائيل مرعوبة – لا بجد، يعني ازاي يعني؟ يا ريت لو نقرا شوية اكتر و احنا هنتأكد انهم مش مرعوبين و لا حاجة، احنا بس اللي واثقين قوي ان الهتاف هو الحل. ملحوظة: انا مصرية فلسطينية الهوى، يعني احب تكون اسرائيل مرعوبة.

8. بمناسبة الصهاينة، مثال جانبي يدل على عدم الاهتمام بالمصدر و السند بأه – برتوكولات حكماء صهيون، اللي ما حدش عارف يسندها للي كاتبها و لا مهتم، فتضعف المصداقية عند الاستدلال بها. مع ان في كنز اسمه يوميات هرتزل، ابو صهيون نفسه، مليانة بلاوي و مسندة اليه من دواهي صهيون الادهياء الاغبياء نفسهم. و ده طبعا لان اسلوب البرتوكولات سخن اكتر و بيناسب الثقافة العامة اللي شكلها الاعلام.

9. لا مخطط لتقسيم مصر – صحابي العراقيون قالوا كده بارضو و للاسف صديقي السوداني الوحيد مصري اكتر من سوداني وهو غير مهتم باحداث السودان بس على الارجح ده كان هيبقى رأيه في السودان.

10. حسني كان ديكتاتور تابع للغرب، لو كان مناضل شريف كنا صدقنا ان ممكن يبقى فيه مؤامرة خارجية للاطاحة به – على فكرة هو لو كان مناضل شريف كان ديته طيارته تنفجر، ما كنش هيبقى احسن من توريخوس بتاع بناما و لا رولدوس بتاع الاكوادور. اما بأه انه يبقى دكتاتور بيخدم مصالحهم فما يقلبوهوش، سوري بس الرجل الكبير في المافيا ممكن يستخدم حد لفترة معينة لخدمة غرض معين و بعد كده عادي يعني يقلبه لو معصلج في حاجة تانية. هل معنى ده ان كل اللي في التحرير بيقبضوا فلوس؟ يا رب ارحمني! هل معناه ان استحالة يكون حد قبض فلوس؟ باردو يا رب ارحمني! على فكرة صدام حسين و امريكا كانوا ايد واحدة. حد بقى يشاور لي على القاعدة العسكرية الامريكية اللي في مصر.

11. احنا نيتنا كويسة – في حديث مشهور عن اللي قتل 99 نفس فراح لعابد (بالتأكيد حسن النية) و سأله هل لي من توبة فقال له لا. فقتله. من أين له هذه الفتوى والى ما تستند؟ تأكده من حبه لربه وحسن نيته. لكن لما راح لعالم و سأله، أجابه: ومن يحول بينك وبين التوبة؟ فتاب. يعني بالبلدي كده حسن النية لوحده بدون علم عادي ودا صاحبه في داهية.

12. اي حد ضد الثورة بالضرورة بيدوب في دباديب مبارك و بيعشق الفساد – خلاص فعلا دخلنا جوا قلوب الناس و نصبنا نفسنا قضاة. برافو. احنا بس اللي مصريين و احنا بس اللي بنفهم و احنا بس اللي صح.

13. ما تقلش انا مسلم، ما تقلش انا مسيحي، قول انا مصري – يعني ايه؟ عشان اقبلك الغي الحاجة اللي احنا مش متفقين فيها و ثبت بس اللي احنا متفقين فيه. دي اغرب دعوة سمعتها، في ظاهرها هي لقبول الاخر و في باطنها اللي بيعمل حاجة مش على هوايا يلعب بعيد عني او ييجي من غير ما يفتح بقه و يجيب سيرتها. اسمها انا مسلم، انا مسيحي و احنا الاتنين مصريين. قبول الاخر يعني بالضرورة الاعتراف بحقه في ممارسة ما جعله "الاخر" و في هذه الحالة هو الدين.

14. ارفع راسك فوق انت مصري – دعوة الى الكسل و مزيد من الاعتماد على ما ليس لنا يد فيه كاساس للشعور بعزة النفس.

15. من النهارده البلد دي بلدك فما تعملش حاجات وحشة فيها – يعني لو طلعت بره، افضحنا، عادي يعني. ما هو على رأي المثل "البلد اللي ما لكش حد فيها، شلح و اجري فيها".

16. لجنة تقصي الحقائق تطلع في التليفزيون خلال مهمتها وتقول الحقائق – و تنزل تاني يوم بعد ما ناس ما كنتش موجودة عرفت الاتجاه لفين تكمل تقصي؟ في كده؟ ده اسمه رز بالملوخية مع اعتذاري للملوخية.

17. و ده سؤال: هو كل الناس مبسوطة بالثورة؟ امال ليه كل اللي بنشوفهم بيهللوا لها و يسقفولها؟ ايه الفرق بين الدكتاتور و بيننا؟

18. البرادعي امل مصر – طب لو مات؟ ضاعت مصر؟

19. النخبة القارئة الواعية تنتخب البرادعي – طب انا بأه مش هانتخبه، بطلت ابقى قارئة وواعية؟  ارجوكم خلوني اكمل لعب معاكم. ممكن نبقى صحاب. ايه ده؟ هو احنا في الحضانة؟ الحمد لله انا و انا عندي 15 سنة كانت دماغي لسعت و قريت لروسو ولسارتر ولينين وتشبعت بجورج اورويل و ميلان كونديرا. عيب يا اساتذة لما نفرش الملاية بالطريقة المهينة دي.

20.  الشعب مش جاهز للديمقراطية عشان كده الانتخابات لازم تتأجل و الناخب الامي ياخد نصف صوت – هه؟ في الاولى فرقتم ايه عن عمر سليمان؟ و في التانية: تقريبا الحمد لله لسه عندي ما يكفي من الانسانية يخلي عقلي يرفض استيعاب مثل هذه المعلومة.

21. في الخريطة، في بلد اسمها مصر، مش بلد اسمها ثورة. فيا ريت همنا يبقى مصر اكتر من الثورة، لان مصر اكبر بكتير قوي من اي حدث او اي مجموعة من الناس. و عشان بالشكل ده مصر هتساعي اللي ضد الثورة باردو. اصلهم مصريين.

22. من باب احترام قدسية الدين، هنركنه على الجنب – وباردو من باب احترام قدسية العلم ياللا نركنه على جنب. ده باطل يراد به باطل. واللي يخاف يقول رأيه الحقيقي يركن هو على الجنب.

23. المادة 2 – نلغيها تأكيدا على مدنية الدولة. ده على اعتبار ان الخليفة كان بيحكمنا و بيطبق شرع الله يعني و هي موجودة؟ طب لا لا نخليها. على فكرة وهي موجودة كان في كل حاجة بتحصل في البلد. بيس يعني. الاصل في القانون تطبيق الناس له مش هو اد ايه شيك ومودرن و لا اد ايه ملزم بشرع الله.

24. رفع علم السعودية في قنا – طب ممكن صورة أو فيديو؟ اشمعنا كل حاجة تانية بتتصور الا الخرافات الاعلامية؟

25. معلومة سامة و السلام ختام – هتلر وصل للحكم بالارادة الشعبية.

                                          امضاء                            

                                                           مواطنة مصرية هتطق من الاعلام