شهادة من قلب محمد محمود

شهادة @__AhmedEmad__ من على تويتر (تغريدات مجمعة) عن أحداث شارع محمد محمود والتحرير في الاسبوع الذي بدأ من 19 نوفمبر 2011

إن شاء الله هنشر دلوقتي شوية تغريدات لتوضيح بعض الأحداث الي حصلت في التحرير من الي عاينته والي وصلني من مصادر موثوقة وهتجاهل اي شئ مش مؤكد.

أولا : الي كان بيضرب رصاص حي هو الجيش مش الشرطة .. الشركة كانت بتضرب غاز وخرطوش ودا الي شوفته وسمعت إن كان فيه مطاطي.

ثانيا :الرصاص الحي الي كان بيضربه الجيش المقذوف بتاعه مقذوف خارق حارق ودا بيستخدم في تفجير تنكات البنزبن دي بشهادة جراح وصف الرصاص لظابط جيش.

ثالثا : كان فيه كماين بتتعمل في محمد محمود واستدراج للشباب للقرب من وزارة الداخلية بتعمد مش مجرد إن الشباب بيتحمس ويروح.

رابعا : الجيش وليس الشرطة ضرب الناس وهي بتصلي المغرب يوم 19 نوفمبر على كوبري قصر النيل واعتقل الي وقف منهم يكمل صلاة وما جريش.

خامسا :تمت حوادث اعتداء بالضرب على سيدات من عساكر الجيش مش الشرطة منهم دكتورة ميدانية كانت في محمد محمود وست كبيرة تانية علشان اتحسبنت علىهم.

سادسا: يوم 22 بعد خطاب المشيرغازغريب انتشر في الميدان وحصلت حالات اختناق منهاأخونا عاصم الشوادفي وشاهد على دا أنس عقيل ‎@anas3qeel‏ ‎@Shwadify‏

سابعا:في محمدمحمودالشرطة ماكانتش بتضرب الغازعلشان تفرق كانت بتتعمدالايذاء بدليل انهاكانت بتسحب الناس وبعدين تضرب قدامهم ووراهم علشان تخنقنهم.

ثامنا :معظم إصابات الخرطوش كانت في الرأس طبعاالمقصود العين ومن الي قابلتهم هناك في محمود محمود مصابين بخرطوش في راسهم ‎@RamyMahrous‏ ‎@melhamy‏

تاسعا : الالتراس كانوا فعلا بيسخنوا جدا في محمد محمود والشرطة بتسخن أكتر لما تشوفهم خصوصا وكانوا الفصيل الوحيد الي بيوجه شتايم خارجة للشرطة.

عاشرا:يوم اجتياح الجيش الي تم مع آخر ضوء قبل المغرب يوم الأحد تقدمت الشرطة من محمد محمود والشباب الي كان جوا اتزنق بينهم عند هارديز واتطحن.

حادي عشر:من الي شفته أستبعد وجود طرف تالت أو عنصر كان بيسخن محمد محمود بل إن الشرطة كانت بتلعب معركة استفزازية بحتة متعمدة لاستفزاز الشباب.

ثاني عشر : الجيش لما اجتاح الميدان مش بس خد الميدان دا وصل لميدان الجلاء ورانا ومع ذلك انسحب بطريقة غريبة جدا ماحدش فاهمها.

ثالث عشر : في شباب فعلا كان معاهم ملوتوف بس نادر وأعتقد اتضرب على الجيش وهو داخل يفض الاعتصام يوم الأحد بس شكلهم متحمسين بخطأ مش مدسوسين.

رابع عشر : الغاز الغريب اتكررضخه في الميدان يوم الاربعاء بالليل كذامرة وفعلا بيأثر مرة واحدة وماحدش عارف جاي منين وشاهد على دا ‎@holysalafy1‏

خامس عشر:والدي لما راح القصر العيني الأحد بالليل يجيب أخوياقالي إن الحالات كتيرجدالدرجة سايبنها في الارض في الطرقة لان مفيش مكان فاضي خالص.

سادس عشر : والدي وصفلي الاصابات الي كان كلها برصاص حي إنها كانت ما بين البطن والرأس والقلب وحصلت حالة وفاة لمصاب وإحنا هناك لشاب اسمه عصام.

سابع عشر :عربيات الاسعاف لم تتواجد بشكل قوي إلا بعد اجتياح الجيش وتدخله وانسحابه ودا دليل تاني إن فعلا الرصاص الحي كان من الجيش مش من الشرطة.

ثامن عشر:ما سمعتش من أي فرد طوال تواجدي في محمد محمودأو في الميدان إنه عايز يدخل ناحية الوزارة أو يقرب منها التركيزكله على الشرطة الي قدامهم.

تاسع عشر : تحليلي للموقف كله إنه معركة استنزافية لاستنزاف شرعية وقوة تأثير وحصانة ميدان التحرير مش فض اعتصام ولا بيفكروا يفضوه أصلا.

الشهادة العشرين والأخيرة : مصدري في الشهادات السابقة الي شفته في محمد محمود والميدان .. اخويا مصاب برصاص حي .. والدي .. طبيب الجراحة ..